૨૮ મેની રાત્રે નાહવા પડતી વખતે સર્જાયો કરુણ અકસ્માત; થરાદ ફાયર બ્રિગેડે ૪૦ મિનિટના રેસ્ક્યુ બાદ બહાર કાઢ્યા મૃતદેહ, બાડમેરના મજૂર પરિવારો ભાંગી પડ્યા
વાવ થરાદ મીડિયા : વાવ થરાદ જિલ્લાના સરહદી એવા થરાદ તાલુકાના કરણપુરા ગામેથી એક અત્યંત હૃદયદ્રાવક સમાચાર સામે આવ્યા છે. અહીં એક ખેતરમાં ખેત તલાવડીની પાળ પર નાહવા બેઠેલા બે શ્રમિક યુવાનોના ઊંડા પાણીમાં ડૂબી જવાથી મોત નીપજ્યા છે. આ કરુણ ઘટનાને પગલે સમગ્ર પંથકના શ્રમિકો અને ગ્રામજનોમાં ભારે અરેરાટી સાથે ગમગીનીનો માહોલ છવાઈ ગયો છે.
પગ લપસતાં સર્જાયું મોતનું તાંડવ
મળતી માહિતી અનુસાર, કરણપુરા ગામે આવેલ એક ખેડૂતના ખેતરમાં મજૂરી કામ કરતા કેટલાક પરપ્રાંતીય શ્રમિકો ૨૮ મેની રાત્રે આશરે ૧૦ વાગ્યાની આસપાસ પોતાનું દૈનિક કામ પૂરું કરીને ખેત તલાવડીની પાળ પર બેસીને નાહી રહ્યા હતા. તે દરમિયાન અચાનક એક શ્રમિક યુવાનનો પગ લપસી ગયો હતો અને તે તલાવડીના ઊંડા પાણીમાં ખાબક્યો હતો. પાણી વધુ હોવાથી તે ડૂબવા લાગ્યો હતો, જેને જોઈને તેની સાથે રહેલો બીજો યુવાન પણ પોતાના મિત્રનો જીવ બચાવવા માટે પાણીમાં કૂદી પડ્યો હતો. જોકે, કમનસીબે પાણીની ઊંડાઈ વધારે હોવાને કારણે બંને યુવાનો પાણીમાં ડૂબી ગયા હતા અને સમયસર બહાર ન આવી શકતા શ્વાસ રૂંધાવાથી બંનેના મોત થયા હતા.
થરાદ ફાયર બ્રિગેડની ટીમ દ્વારા ૪૦ મિનિટનું રેસ્ક્યુ
આ ભયાનક ઘટનાની જાણ આસપાસના લોકોને થતાં જ તાત્કાલિક થરાદ નગરપાલિકા ફાયર બ્રિગેડને જાણ કરવામાં આવી હતી. ઘટનાની ગંભીરતાને સમજી ફાયરની ટીમ તાત્કાલિક સ્ટાફ અને સાધનો સાથે ઘટનાસ્થળે દોડી આવી હતી. અંધારાના કારણે રેસ્ક્યુ ઓપરેશનમાં મુશ્કેલી પડી રહી હતી, છતાં ફાયર ટીમે આશરે ૪૦ મિનિટની ભારે જહેમત અને શોધખોળ બાદ બંને યુવાનોના મૃતદેહોને બહાર કાઢવામાં સફળતા મેળવી હતી.
મૃતકોની ઓળખ થઈ, પરિવારોમાં કલ્પાંત
ફાયર ટીમ દ્વારા બહાર કઢાયેલા બંને મૃતદેહોને પોલીસની હાજરીમાં પોસ્ટમોર્ટમ માટે થરાદની સરકારી હોસ્પિટલ ખાતે ખસેડવામાં આવ્યા હતા. હોસ્પિટલના સૂત્રો અને પોલીસ તપાસમાંથી મળતી વિગતો મુજબ, મૃતક યુવાનોની ઓળખ રાજસ્થાનના બાડમેર જિલ્લાના સારલા ગામના માજીરાણા અરવિંદ હરિરામભાઈ અને જાલીંબા ગામના માજીરાણા પ્રકાશ કેવળરામ તરીકે થઈ છે. આ બંને યુવાનો અહીં રોજગારી મેળવવા અર્થે આવ્યા હતા. હોસ્પિટલ ખાતે પીએમની વિધિ પૂર્ણ થયા બાદ પરિવારો બંને મિત્રોના મૃતદેહ લઈને વતન રાજસ્થાન જવા રવાના થયા હતા. જુવાનજોધ દીકરાઓના અકાળે મોતથી શ્રમિક પરિવારો પર આભ તૂટી પડ્યું છે.
**સૌથી ઝડપી, નિષ્પક્ષ અને સચોટ અહેવાલો માટે જોતા રહો અને વાંચતા રહો "વાવ થરાદ મીડિયા" – સત્યનું
ઉજાગર, નિષ્પક્ષ સમાચાર, નીડર અવાજ.**
✍️દિનેશ બી જાખેસરા (પત્રકાર) વાવ થરાદ મીડિયા
0 ટિપ્પણીઓ