ઇંદરવા-ગાંજીસર કેનાલ: તંત્રની બેદરકારી સામે ખેડૂતોનો 'જાત મહેનત ઝિંદાબાદ'નો જંગ
પાટણ જિલ્લાના ગાંજીસર ગામે સિંચાઈ તંત્રની ઘોર બેદરકારીનો વરવો ચહેરો ખુલ્લો પડ્યો છે. ખેડૂતોની જીવાદોરી ગણાતી ઇંદરવા-ગાંજીસર મુખ્ય કેનાલ વર્ષોથી સફાઈ વિના સબડી રહી હતી, પરિણામે કેનાલમાં બાવળિયા, ઝાડી-ઝાંખરાં અને કચરાના ઢગલા જમા થઈ ગયા અને પાણીનો પ્રવાહ સંપૂર્ણપણે અવરોધાયો. તંત્રની ઊંઘ ન ઊડતાં છેવટે ખેડૂતોના પાકને સહન કરવો પડ્યો ભારે ફટકો.
ગ્રામજનોના જણાવ્યા મુજબ, કેનાલની દયનીય હાલત અંગે વારંવાર તંત્રને રજૂઆતો કરવામાં આવી હતી, પરંતુ કોઈ નક્કર કાર્યવાહી થઈ નહીં. પરિણામે સિંચાઈનું પાણી ખેતરો સુધી પહોંચી ન શકતાં પાક નિષ્ફળ જવાના આરે આવી ગયો.
**તંત્રની રાહ જોવાને બદલે ખેડૂતો પોતે મેદાનમાં ઉતર્યા*
તંત્ર તરફથી કોઈ મદદ ન મળતાં ગાંજુસરના ખેડૂતોએ કમર કસી. એકજૂથ થઈ, પોતાના જ ખર્ચે અને પરસેવાથી કેનાલમાં જામેલા બાવળિયા-ઝાંખરાં કાપી, પાણીનો રસ્તો જાતે ખુલ્લો કર્યો. આ સંઘર્ષ દરમિયાન ખેડૂતોએ ગજવેલા અવાજે 'જાત મહેનત ઝિંદાબાદ'નો નારો ગુંજાવ્યો — જે તંત્રની નિષ્ક્રિયતા સામે એક જડબાતોડ જવાબ સમાન બની રહ્યો.
ખેડૂતોનો સીધો સવાલ: જવાબદારી કોની?ખેડૂતોએ આકરા શબ્દોમાં પ્રશ્ન ઉઠાવ્યો છે કે કેનાલોની નિયમિત સફાઈ અને જાળવણીની જવાબદારી સરકારી તંત્રની હોવા છતાં, વર્ષોથી આ કામ કેમ કરવામાં આવ્યું નથી? જો ખરેખર નિયમિત નિરીક્ષણ અને જાળવણી થતી હોય, તો કેનાલની આટલી બદતર હાલત સર્જાઈ જ કેવી રીતે શકે? પાણીના અભાવે થયેલા પાક નુકસાનની જવાબદારી હવે તંત્રએ સ્વીકારવી જોઈએ, તેવી માંગ ખેડૂતોમાં પ્રબળ બની છે.
_✍️દિનેશ બી જાખેસરા, પાટણ
0 ટિપ્પણીઓ