સુઈગામ સરહદે આવેલા ભરડવા ગામે પીવાના પાણીની વિકટ સમસ્યા ગ્રામજનોમાં રોષ, તાત્કાલિક પાણી પુરવઠાની માંગ...
સુઈગામ તાલુકાના ભરડવા ગામમાં પીવાનું પાણી ના મળતાં લોકો ત્રાહીમામ પોકારી ગયા છે.
વાવ થરાદ જિલ્લાના સુઈગામ તાલુકાના ભરડવા ગામમાં પીવાના પાણીની ગંભીર સમસ્યા સર્જાતા ગ્રામજનો ભારે મુશ્કેલીનો સામનો કરી રહ્યા છે. ઉનાળાની ગરમી વચ્ચે ગામમાં નિયમિત પાણી પુરવઠો ન મળતા લોકો પાણી માટે વલખાં મારી રહ્યા હોવાનું જાણવા મળ્યું છે.
પ્રાપ્ત વિગતો મુજબ ગામના અનેક વિસ્તારોમાં છેલ્લા કેટલાક દિવસોથી પૂરતા પ્રમાણમાં પાણી મળતું નથી. જેના કારણે મહિલાઓને વહેલી સવારથી પાણી માટે લાઈનોમાં ઉભા રહેવું પડે છે. કેટલાક પરિવારોને તો દૂરના વિસ્તારોમાંથી પાણી લાવવાની ફરજ પડી રહી છે. પાણીની અછતને કારણે દૈનિક જીવન પર પણ અસર પડી રહી હોવાનું ગ્રામજનોએ જણાવ્યું હતું.
ગ્રામજનોએ આક્ષેપ કર્યો હતો કે અનેક વખત સંબંધિત વિભાગ અને સ્થાનિક તંત્ર સમક્ષ રજૂઆતો કરવા છતાં સમસ્યાનો કાયમી ઉકેલ આવ્યો નથી. ઉનાળાની સિઝનમાં પાણીની માંગ વધતા હાલ પરિસ્થિતિ વધુ ગંભીર બની છે.
સ્થાનિક લોકોએ તંત્ર સમક્ષ તાત્કાલિક ટેન્કર મારફતે પાણી પુરવઠો શરૂ કરવા તેમજ ગામમાં નિયમિત અને પૂરતો પાણી પુરવઠો ઉપલબ્ધ કરાવવા માંગ ઉઠાવી છે. જો વહેલી તકે યોગ્ય કાર્યવાહી નહીં કરવામાં આવે તો ગ્રામજનો દ્વારા ઉગ્ર રજૂઆત કરવામાં આવશે તેવી પણ ચીમકી ઉચ્ચારાઈ હોવાનું જાણવા મળ્યું છે.
અહેવાલ : દિનેશ બિ જાખેસરા,વાવ થરાદ...
ટિપ્પણીઓ નથી:
ટિપ્પણી પોસ્ટ કરો